မသန်စွမ်းတဲ့ သားဖြစ်သူ စာသင်နိုင်ဖို့ တစ်နေ့ ၁၈ မိုင်အကွာ

မသန်စွမ်းတဲ့ သားဖြစ်သူ စာသင်နိုင်ဖို့ တစ်နေ့ ၁၈ မိုင်အကွာအဝေးကို ကျောပိုးပြီး လိုက်ပို့တဲ့ ဖခင်မိဘတွေဆိုတာ သားသမီးတွေအတွက် စွန့်လွှတ်ဖို့ အသင့်ရှိကြသူတွေပါ။ ယုတ်စွအဆုံး အသက်စွန့်ရမယ် ဆိုရင်တောင် တွန့်ဆုတ်နေကြမယ့်သူတွေ မဟုတ်ပါဘူး။တရုတ်နိုင်ငံက ဖခင်တစ်ဦးကလည်း ဒါကို သက်သေပြနေပါတယ်။ သူဟာ မသန်စွမ်းတဲ့သားဖြစ်သူ ကျောင်းတက်ခွင့်ရဖို့အတွက် သားကို ကျောပိုးပြီး တစ်နေ့ ၁၈ မိုင် လမ်းလျှောက်နေသူပါ။ အခုအချိန်မှာ အသက် ၁၂ နှစ်အရွယ်ရှိနေတဲ့ ရှောင်ကွင်းဟာ ခြေတွေ၊ လက်တွေ လိမ်နေပြီး ကျောမှာ ဘုကြီးရှိနေလို့ သူတို့နေထိုင်ရာ ဖန်းယီမြို့နယ်တစ်ဝိုက်မှာရှိတဲ့ စာသင်ကျောင်းတွေက သူ့ကိုိ လက်မခံကြပါဘူး။ ဖန်းယီမြို့နယ်ဆိုတာ တရုတ်နိုင်ငံ အနောက်တောင်ပိုင်း စီချွမ်ပြည်နယ် ယီဘင်းစီရင်စုမှာရှိပါတယ်။
ရှောင်ကွင်း ၃ နှစ်သားအရွယ်ကတည်းက သူ့အမေက သူတို့သားအဖ နှစ်ဦးကိုထားပြီး အိမ်က ထွက်သွားခဲ့တာပါ။ ဒါကြောင့် မိတဆိုး သားလေး စာသင်နိုင်ရေးက ယုဆုခန် တစ်ဦးတည်းရဲ့တာဝန် ဖြစ်လာခဲ့ပါတယ်။ စာသင်ကျောင်း တော်တော်များများက လက်မခံကြတဲ့ ရှောင်ကွင်းကို ဖန်းယီမူလတန်းကျောင်းက စာသင်ပေးဖို့ လက်ခံခဲ့ပါတယ်။ ဒါပေမဲ့ ရှောင်ကွင်းက ကိုယ့်ဘာသာကိုယ် ကျောင်းမသွားနိုင်လို့ဖခင်ဖြစ်သူ ယုဆုခန်က ရှောင်ကွင်းကို တောင်းထဲထည့်လို့ ကျောမှာလွယ်ပြီး ကျောင်းလိုက်ပို့ပေးခဲ့ပါတယ်။
ရှောင်ကွင်းဟာ အသက် ၁၂ နှစ်အရွယ် ရှိနေပေမယ့် အရပ် ၉၀ စင်တီမီတာ(၃ ပေ)ပဲရှိပါတယ်။ ဆုခန်ဟာ သားကို ကျောင်းပို့ပြီးရင် အိမ်ပြန်လာပြီး စားဝတ်နေရေးအတွက် အလုပ်လုပ်ရသလို ညနေကျရင်လည်း သားကိုကျောင်းသွားကြိုရပါတယ်။ သားဖြစ်သူ တစ်ရက် စာသင်ဖို့အတွက် ဆုခန်က ၄ မိုင်ခွဲခရီးကို တစ်နေ့ ၄ ခေါက်သွားရလို့ သူ လမ်းလျောက်ရတာ တစ်နေ့ ၁၈ မိုင် ရှိပါတယ်။ဆုခန်ဟာ ပြီးခဲ့တဲ့ စက်တင်ဘာလကစလို့ သားဖြစ်သူကို တစ်ရက်မပြတ် ကျောင်းလိုက်ပို့ခဲ့ပါတယ်။ သူဟာ မနက်တိုင်း ၅ နာရီဆို အိပ်ယာထရပြီး ထမင်း၊ ဟင်း ချက်ပြုတ်ပြီးရင် သားဖြစ်သူကို ကျောင်းလိုက်ပို့လေ့ရှိပါတယ်။ သားဖြစ်သူ ရှောင်ကွင်း စာသင်ကြားနိုင်ဖို့ ဒီကနေ့အချိန်အထိ ဆုခန့် လမ်းလျှောက်ခဲ့ရတာ မိုင်ပေါင်း ၁၆၀၀ ရှိနေပါပြီ။ ဒါပေမဲ့ သားဖြစ်သူက အတန်းထဲမှာ စာတော်တဲ့ကျောင်းသားဖြစ်နေလို့ ကျေနပ်မိတယ်လို့ ဆုခန်က ပြောပါတယ်။ သူတို့ သားအဖအကြောင်း သတင်းပျံ့သွားချိန်မှာ တရုတ်အာဏာပိုင်တွေက ကျောင်းနဲ့အနီးနားတစ်ဝိုက်မှာ အိမ်ငှါးပေးမယ်လို့ ကြေညာခဲ့ပါတယ်။ သားဖြစ်သူ ကောလိပ်တက်နိုင်ရေးက သူ့အိပ်မက်ပဲလို့ ဆုခန်က ပြောပါတယ်။
Nz(ရိုးရာလေး)